有朋友搬往沙田車公廟站嘅「溱岸」，對居住環境幾滿意，博物館就喺隔籬啫，平時得閒無事就行過去睇展覽，感覺得成個人都充滿文化藝術氣息。
不過一講到泊車，就跌回凡塵，滿身銅臭，因為「溱岸」一個車位叫價二百五十萬元，仲未必有吉位出售㖭，搞到佢紮紮跳，滿肚怨氣，因呢位朋友有親戚住在大圍「名城」，亦遭遇同樣難題，有車冇車位，叫苦連天。反而佢地嘅恩師教授住在駿景園，幾年前用五十萬買入一個車位，現在亦只係升到一百萬左右啫，以今時今日嘅樓價比較，仲係比較合理。
朋友問左丁山：「點解駿景園車位比名城、溱岸平咁多？」無他啫，供求問題啫，駿景園建於90年代，當時車位及一啲公共面積可以「發水」，發展商旨在賺樓價，起大個停車場，多啲車位供應，並不相干，故此駿景園有大把車位，炒家用家想谷起個價，並不容易。後來政府逐漸收緊發水比例，卒之在2011年4月1日起規定發水不得超過10%，於是以後興建嘅新樓就相應大量減少車位，例如近來入伙嘅九肚山「玖龍山」相當缺乏車位，容易炒高價。「名城」與「溱岸」之入則，應在2011年之前，但車位一樣唔夠，可能係位於火車站上蓋，低估咗需求啦。
純講市場經濟，發水可以增加發展商利潤，自然可以刺激車位供應上升，你大罵地產霸權都係咁講，譬如前幾日講日本自2002年後放寬市區重建住宅規條，增設發水條款，奠定業主發展權利（即他人不能反對），又可將商廈重建為住宅（rezoning），拆古老樓宇而按最新防地震建築標準起樓，又有發水獎勵，於是東京樓宇供應量急升，壓低晒樓價，表面睇係業主與發展商賺晒，但樓價不上升其實對整個社會穩定亦有裨益，不可瞌埋眼大罵地產霸權。8月11日蘋果大版報道許愛周家族在上水愛園斬樹，欲興建幾座25層高住宅樓宇，長春社及附近業主反對，要向城規會呈交反對意見。嗱，同樣事件若在東京發生，根據金融時報記者Harding嘅報道，許家話起樓就起樓嘅嘞。美國方面亦有嚴格規劃，興建新宅唔係想像中咁容易，一位世姪在新英倫一帶與美國朋友合資創業，就係「劏樓」，買入大面積單位，改裝為細單位，一變二或變三，再出租予有色人種，大受歡迎，好好租，這就是起樓不易，明益劏房嘅道理。