今天（8月18日）對光大集團應該別具意義，光大銀行（6818）嘅A股早於2010年8月18日上市，銀行翌年計劃在港上市時，亦力爭呢日掛牌，可惜當時市況唔就，直情要擱置計劃，一波三折後，最終於2013年底在港上市，到咗光大證券（6178）今日掛牌，又係8月18日，佢哋真係好鍾意呢日喎。
之前有人認為，光大證券食正條水，國務院宣佈落實深港通之後兩日掛牌，實有運行，但噚日大市已經係sell on fact，股民排住隊沽貨，食正條水定潛水呢？天曉得嘞。
有位散戶就好捧佢場，根據公司通告，有一位散戶落頭槌飛，大手認購1,500萬股，最終獲發645萬股，以招股價12.68元計，涉資逾8,100萬元，真夠熱情。