最近香港好多政治新聞，除咗立法會選舉，又有下屆特首選舉提早開跑，幾隻黑馬輪流見報，曾經選過特首嘅「唐唐」，唐英年噚日語帶雙關話，呢排佢剝咗好多花生，真係幾熱氣！不過呢個超級花生友唔係齋睇唔講，佢噚日接受民建聯主席李慧琼訪問，就逐個評價疑似下屆特首候選人。
話說琼子訪問唐唐，同訪問佢師父曾鈺成一樣，預備小食畀來賓，琼子仲大玩特首選舉，用薯片、龍蝦片同花生，影射鬍鬚曾、梁特同林鄭月娥，問唐唐鍾意食邊樣？唐唐即語帶雙關話，自己呢排冇去旅行，大部份時間留港剝花生，食到好滯好熱氣，所以都係唔食！咁八方私下問佢，係咪最愛食薯片？唐唐就話薯片都熱氣，不過無龍蝦片咁熱氣，再問佢會否食涼粉下火，唐唐就話涼粉唔好食㗎，冇乜味，淡茂茂，在場唔少記者聽到佢句句有骨，都忍唔住笑。
寸CY做得不足
不過唐唐又唔只齋做花生友，佢喺琼子對談入面，都有講到三個疑似下屆特首候選人。唐唐提到林鄭近日話被傳媒斷章取義，佢話做得公眾人物預咗，又話自己當年亦試過類似情況，所以叫林鄭要食得鹹魚抵得渴。
至於鬍鬚曾同曾主席呢一對「雙曾」又點呢？唐唐話好欣賞同支持曾俊華、曾鈺成呢啲有能力嘅人考慮選特首，又話自己同鬍鬚曾共事多年，大讚佢有能力、愛國愛港，如果鬍鬚曾願意參選，呢個係一件好事喎！
最後又點少得現任特首梁振英？琼子問唐唐下屆換特首，係咪仲好呢？唐唐冇直接答，只係重申佢2012年送畀梁振英嗰一句說話，就係梁喺政通人和做得不足，希望對方做得更好喎。唐唐4年後仲送同一句話畀梁特，佢點睇梁特連任，怕且不用多講！李慧琼參選今屆立會超級區議會界別，其他名單排首名有涂謹申、梁耀忠、王國興、鄺俊宇、周浩鼎、陳琬琛、關永業同何啟明。
李八方
mailto:[email protected]