中環在線:梁振英自讚成立金發局 - 李華華

中環在線:梁振英自讚成立金發局 - 李華華

深港通星期二下晝突然通車,特首梁振英(CY)毫不例外有水就抽,讚自己成立金融發展局好叻叻,咁都得?
CY當晚寫Blog,當然話歡迎深港通原則性獲批,又感謝中央支持乜乜乜咁啦,最妙嘅係佢話相信金融業可以繼續壯大發展,為青年人提供高人工嘅工作,「也是我四年前成立金融發展局的原因」。
其實金發局一直都係政府智庫,純諮詢,CY又何必要攞嚟邀功,仲要係唔多關事嘅深港通?唔通喺深港通開始前,佢冇份攞彩,所以一記回馬槍,唔好蝕底?
個Blog仲問,「沒有一國兩制,香港的金融業會有好的發展前景嗎?」唔知CY有冇炒股,當內地向世界輸出股災、上市金融機構要真金白銀搬錢為國護盤時,你可以問吓啲證券行散戶,究竟支持國家定支持自己銀包。