仲記得香港爆發SARS嗰陣,大家都爭住去買白醋,話煲醋可以殺菌,原來呢類偏方喺英國都有!大家都知里約嘅水質唔多好,據報好多菌,但英國划艇選手史高菲特(Jon Schofield)就話冇有怕,因為佢有秘密武器,就係可樂嘞!佢話:「可樂可以殺死你口入面嘅細菌,如果你跌咗落水,就飲啖可樂用嚟漱口。係教練建議咁做㗎,因為可樂係酸性,可以殺菌。」史高菲特講到頭頭是道咁,但真係唔多信可樂咁勁囉。