馬勒（Gustav Mahler）係19世紀嘅奧地利著名指揮家，但查實佢最鍾意作曲，前後寫咗9首交響曲，到佢去世後先開始有人欣賞，仲影響唔少20世紀嘅音樂家。
估值約3,530萬
其中最出名嘅馬勒第二交響樂曲《復活》，佢嘅手稿（圖）將會喺11月由倫敦蘇富比拍賣，估值超過350萬英鎊（約3,530萬元），隨時係拍賣史上最貴嘅樂譜手稿。
《復活》喺1888至1894年間完成，以死後世界為題，探究生命意義，需90位演奏家聯合演出，歷時逾90分鐘。最為人津津樂道嘅係已故美國商業巨子卡普蘭，1965年首次欣賞《復活》後被吸引，環遊全世界咁聽唔同樂團演奏馬勒作品，最後自學成材，以業餘指揮家身份同專業樂團合作，喺全球各地演出《復活》逾100次。
今次嘅手稿係卡普蘭珍藏，長達232頁，上面有馬勒用藍色蠟筆刪減、修改及標註嘅筆記，從未喺市場曝光，專家形容係「前無古人，更可能後無來者」。拍賣之前，《復活》手稿會嚟香港，即日起至8月19日（聽日）喺香港蘇富比藝術空間有得睇。