林丹同李宗偉嘅巔𥧌之戰，如願喺里約奧運上演！周三羽毛球男單八強，兩位頂尖球手都順利晉級，香港時間周五晚上七點半就會喺準決賽交手，鍾意羽毛球嘅球迷一定唔可以錯過。
周五合演四強激鬥
世界排名第一嘅李宗偉，被諷刺為「千年老二」，多少都係拜林丹所賜，由京奧、倫奧決賽，甚至亞運同世錦賽決賽都輸過畀林丹，好彩周五再遇林丹唔係決賽，希望呢位大馬一哥壓力冇咁大。講番周三八強，李宗偉晉級過程比較輕鬆，對住中華台北嘅周天成輕勝21:9、21:15。相反「超級丹」贏印度球手斯里坎夫就辛苦啲，雖然林丹以21:6先贏第一局，但第二局打得保守，俾斯里坎夫頻頻扣殺得手追番局21:11；呢位23歲球手第三局更一度領先11:8，滿以為爆冷之際，力爭奧運三連霸嘅林丹始終經驗較佳，以21:18驚險晉級。
林丹同李宗偉周五就會進行雙方歷來第37次交手，之前36場林丹贏咗25場。不過，雖然兩人場內鬥得你死我活，其實私底下都相當老友，惺惺相惜㗎。