肉檔揸弗那位師奶分割員發愁問，點樣策略性投票呢，她心儀的立會候選人，在幾輪的民調中一直低位徘徊，難道要她放棄當選機會不大的，改投有機會入局的另一位？「我做唔出，明知佢低票，更加無理由離棄佢，咁衰仔。」師奶言之成理，義薄雲天。學者一直鼓勵選民緊跟民調，有乜依郁，為大局着想，必須改投手中神聖的兩票給同路人。
「即是又係叫我們含淚投票，咪玩啦，次次都含，結局又係建制玩晒。」這是選民真實的心態，棄保但無法扭轉政局，選民全家動員左度右度計到最盡，都無法動搖輪椅、鄉紳的蛇齋餅粽鐵票。西環統籌，票源不絕，擘大眼表演種票借票過票，西環上契那批臉孔，屆屆都會順利當選。「我最驚今年選舉主任無跟狼特接觸都會出蠱惑，幫建制隊冧泛民，在票箱做手腳，跟住又話收到恐嚇信扮受害！」
挽住脢頭和腩排離去時，師奶咿咿哦哦說自我感覺似生豬肉。學晒狼特猛砌香港人的林鄭，狂傲自稱百毒不侵，食哮喘豬肯定無事嗰隻。百毒司長vs港獨之父，兩個都啪禁藥爭金，評述員是阿叻，觀眾唔使諗，熄機！