選舉事務處近日公佈立法會選舉候選人簡介，識睇梗係睇有話題嘅候選人啦。好似正義聯盟李偲嫣，除咗佢幅涉嫌P圖外，梗係要留意佢政綱點樣惠民生啦。八方一睇，第一項就係「監察法官」，咁如果佢當選，一眾法官一定永無寧日喇。但警察就會好鍾意偲嫣，因為佢政綱第二項就係要立辱警罪。
另一位新東候選人陳玉娥追隨CY多年，佢喺簡介話自己係「公民社會活躍人士」，4次表明「撐CY」，次數冠絕一眾候選人，又話自己係「潮州女漢子」。至於真正嘅潮州怒漢、港島候選人詹培忠，佢嘅簡介只有兩段，話如果當選，承諾一定做到：「詹培忠，敢衝鋒，為香港，講真話」。該區其他參選名單，請參閱本報立會選戰網站 http://hk.apple.nextmedia.com/legco2016/region 。