有球員喺一場比賽裏面兩次射失12碼，點知做唔到敗家仔之餘，仲可以成為贏波英雄。周二歐聯附加賽首回合，曼城作客布加勒斯特星隊，雖然前鋒阿古路射失兩球12碼，但入夠三球補數，藍月最終以5:0大勝，大半隻腳入咗分組賽咯。
大衛施華喺開賽13分鐘先開紀錄，之後曼城有兩次極刑機會，點知阿古路主射就一次被撲救、一次中楣。好在佢冇洩氣，分別喺41、78同89分鐘連入三球，加埋新兵洛尼圖開齋，最終曼城以5:0大勝，入分組賽極穩。主帥哥迪奧拿賽後話：「足球比賽無可避免會出現射失12碼情況，好在阿古路可以保持集中。今場波賽果冇得頂，我哋已經無限接近躋身分組賽。」
哥迪奧拿賽後仲話會繼續畀阿古路做劊子手，不過佢可能真係要諗清楚啲。連埋呢兩球，阿古路最近五次喺歐戰為曼城射12碼失咗四球，你估次次都可以宴客完又食大三元咩。
阿古路否極泰來，但門將赫特情況就真係唔多樂觀，佢今場波又喺後備席齋坐，據報曼城已經同巴塞隆拿傾掂數，同意以1,700萬鎊（約1.7億港元）收購門將哥迪奧巴禾，成事之後睇怕赫特都要執包袱。