一般嚟講，大亨、大孖沙嘅另一半，通常都收收埋埋，好少高調露面，之不過，永利澳門（1128）主席史提芬永利（Steve Wynn），噚日就帶埋第二任太太Andrea Wynn，一齊到澳門主持新酒店嘅預展活動。
開場之前，佢兩公婆sweet sweet咁拖住手仔入場，Andrea Wynn扶實史提芬永利上台之後，就落番台睇住老公講夢想，仲用好崇拜嘅目光望到實。每當史提芬永利聽得唔清楚記者嘅問題，Andrea Wynn就會喺台下提水。
成個活動個幾鐘，74歲嘅史提芬永利都算厲害，喺台上企足個幾鐘，依然談笑風生，去到尾段可能見累，換咗幾次姿勢，呢個時候Andrea Wynn就好醒目，慢慢行去公關旁邊，低頭講幾句，冇幾耐大會就宣佈活動結束。大亨老婆原來就係要咁貼心、咁醒目嘞。