內地手機廠小米曾經係全球最高估值startup，但隨住內地手機市場漸見疲弱，加上競爭劇烈，小米似乎後勁不繼。IDC最新發表報告指，今年第二季小米嘅智能電話出貨量按年大跌近4成，得番1,050萬部，喺內地市場排梗頸四。
頭三名嘅分別係華為、OPPO同埋Vivo，IDC認為，華為與OPPO嘅成功有賴佢哋嘅宣傳策略，華華同意，重點可能仲落喺代言人身上先㖭。
華為非常之有「國際視野」，之前重金請來「球王」美斯做代言，最新嘅手機亦搵來新一代「超人」亨利卡維（Henry Cavill）同埋性感女神「黑寡婦」施嘉莉祖安遜（Scarlett Johansson）。
排第三位嘅Vivo上半年亦出到2,200萬人仔，請來《太陽的後裔》宋仲基oppa做代言。相比小米搵咗個冇乜人識嘅內地男星劉昊然代言，可以話一睇就知「死因」喺邊。