足球員插水博12碼或罰球大家就見得多，估到唔連里奧嘅田徑賽事都有，仲係打孖上，其中巴哈馬選手米娜仲插贏美國嘅費妮絲而贏咗女子400米跑。
米娜贏0.07秒摘金
周一嘅女子400米跑決賽，巴哈馬嘅米娜一早就彈出，去到尾段冇力腳軟，臨衝線嗰吓使出一招飛身插水，以0.07秒之差力壓倫敦奧運女子200米跑金牌得主嘅費妮絲，戲劇性贏咗呢面金牌。米娜賽後話：「我去到最後20米先見到其他人，當時我個腦淨係得面金牌。衝線果吓我個腦一片空白，嗰吓（插水）係自然反應。之後我瞓咗喺度，雖然手腳擦傷咗撞瘀咗，但唔係好嚴重。呢面金牌我等咗好耐，所以真係好開心好激動。」但攞唔到第五面奧運金牌嘅費妮絲就陰公豬：「我真係好失望。」
除咗米娜，巴西選手迪奧利華拉都用插水呢招。迪奧利華拉喺男子110米欄嘅預賽跑第三組，衝線一刻可能見自己落後太多，於是把心一橫飛身插水，但又畀佢博到喎，以13秒63得第四位，以0.01秒之差力壓南非選手艾卡拿而出線準決賽。賽後佢認係專登咁做：「我成日咁做，所以唔係意外，但之前喺中國咁做試過斷肋骨。啲人都叫我唔好咁做，但我真係全心全意比賽㗎。」
另外，牙買加選手甘普爾喺女子200米跑預賽，一掟彎就跑錯入其他選手條線，雖則冇被大會取消資格，但只係得第三名，入唔到決賽。查實佢舊年喺北京比賽都試過係咁，睇嚟佢對眼真係有啲問題。