一直參與推動性小眾平權嘅跨性別資源中心主席、女同志梁詠恩（Joanne），雖然今屆未能代表民主黨出戰立法會選舉，但仍然非常留意唔同候選人嘅政綱，對性小眾權益相當著緊。
佢前日發現，參選新界西嘅建制派候選人何君堯嘅宣傳單張，除咗用英文寫明反對同性婚姻，就連同「姓」婚姻都反對，唔係咁專制嘅？難怪佢都要喺facebook寫返句：「原來何君堯反對同『姓』結婚！係咪傻㗎？」
唔少網民睇到，梗係笑到花生殼滿地，有網民揶揄：「即係唔可以『何何』聯婚？」，有心水清網民就話：「陳豪老婆都係姓陳」喎？當然唔少網民就相信佢係手民之誤，無理由同「性」之餘連同「姓」都唔畀結婚，笑問呢位前律師會會長，有乜法理依據先？到底係咪連同「姓」結婚都無眼睇？真係要由何君堯自己話畀大家聽係唔係！
同區其餘參選人名單詳見此網站:
http://hk.apple.nextmedia.com/legco2016/region