吳若希同姚子羚，原本大纜扯唔埋，不過竟然都有撞樣嘅時候！
日前吳若希孖男友去台灣旅行，唔知係咪開心得濟，吳若希喺台灣機場禁區嗰陣，10張有9張相係開懷大笑緊，笑到牙肉都露埋出嚟！
雖則化咗妝嘅吳若希，對眼唔算細，但唔知點解，笑起上嚟，竟然有幾分似表哥姚子羚……吳若希呢張潛力圖，潛力絕對唔輸蝕得過表哥囉！
而今次吳若希一行六人明明係去台灣，不過吳若希個老死KellyJackie，就喺ig特登貼咗張喺機場禁區影嘅大合照出嚟，後面個牌就顯示目的地係新加坡，搞到唔少fans中晒伏，有人仲留言叫佢哋記得買班蘭蛋糕。到前日吳若希男友Alex先揭盅，原來佢哋今次係台灣行至啱！