百富環球（327）呢一粒財經花生真係有排食，正當人人以為財務總監（CFO）李書沸（Chris Lee）之前say咗sorry就冇事，佢噚日突然宣佈，即日辭去公司所有職務。
到底乜事搞到要辭職咁大鑊？將件事回帶，話說上周三百富舉行業績分析員會議，李書沸在會上怒趕麥格理分析員Timothy Lam走，佢不停手指指叫對方「out！」，市場估計，佢咁嬲係因為Timothy今年4月出報告唱淡公司，畀百富「跑輸大市」評級。
成個過程被現場其他分析員拍低咗，並迅速廣傳金融圈，李書沸隔咗一日都知衰，發聲明對自己行為表示歉意，又話已經汲取教訓云云。正當大家以為故事完結，噚日佢就話要辭職。
睇番百富股價，噚日跌1%，市值跌穿70億元，唔知關唔關事呢？
李書沸亦再say sorry，指不論背後有任何原因，當日嘅行為亦唔能夠接受，又話自己一直強調企業團隊應當具有專業表現，當時就冇達到呢個水平，因為咁，「我願意肩負責任，承擔後果。」
唯有講句，希望佢以後懂得平心靜氣喇。
李華華
mailto:[email protected]