昨日鬼節，最啱講鬼。如果你同費清一樣，係鬼故漫畫迷，一定認識伊藤潤二，伊藤老師早前喺台灣嘅體驗展覽，終於會嚟香港喇！「伊藤潤二恐怖美學體驗大展」fb專頁趁住盂蘭節公布，展覽會喺今年冬季襲港，展出日期、地點、售票訊息將會喺近日公佈。
無數嘅晚上，費清都會一個人喺房慢慢欣賞剛剛出版嘅伊藤潤二漫畫，睇住絕色美女《富江》點樣畀男人殺完又殺，翻生完再翻生（其實係另類fatal attraction）；永無休止嘅詛咒《漩渦》；仲有啲男主角，個個都黑眼圈（縱慾過度咁款．．．）伊藤老師嘅作品，唔只用恐怖畫面嚇人咁簡單，好多時係挑戰讀者感官，例如一個個人頭氣球，線條不斷重複嘅漩渦，除咗令人有密雜恐懼症，亦會有一種詭異美感。
台灣展覽舊年12月至今年2月舉行，重現老師經典場景，例如有手稿、人頭氣球照相亭，仲會結合手機APP「伊藤潤二AR」，開啟APP對準展品，漫畫就會喺手機畫面活動起嚟，而且又有VR眼鏡體驗恐怖氣氛。
費清問過台灣主辦單位，香港展覽有咩分別，佢哋話要賣吓關子，好快公布㗎喇。
Are you ready？體驗伊藤潤二老師嘅恐怖美學。
費清＃要生計，也要生活＃毋忘初衷