打住反對特首梁振英連任旗幟嘅港島區候選人王維基，噚日千里迢迢過海到新東沙田，唔係轉區出擊，而係搵自由黨李梓敬宣誓，要求承諾一旦當選，喺議會內表決反對梁振英連任嘅動議時，要投贊成票。
反689成為今年選舉新陣營，非建制派除咗王維基咁「明張目膽」，當然唔少得被搣政協柴都照舊斥狼嘅自由黨田北俊。如果想喺議會內壯大聲勢，梗係越多同路人越好，所以維基都好想自由黨李梓敬領軍嘅新東名單保一爭二，所以噚日去叫李梓敬表明心迹。
Yo，ABC啫，使乜驚呀？李梓敬隨即舉起3隻手指立誓，話如果唔做，自由黨選乜都輸。維基嫌唔夠毒，叫佢再發過，李話不如孤獨終老？點知維基都未夠喉，最終李話違反誓言就會天打雷劈先收貨！發完誓，維基向對方教授「降狼十八掌」，李則以「打689棒」作回禮。唔知打狼棒係咪有助佢哋打到入立會呢？該區其他參選名單，請參閱本報立會選戰網站 http://hk.apple.nextmedia.com/legco2016/region 。