股民望穿秋水嘅深港通終於開通，國務院總理李克強噚日收市後一句話批准《深港通實施方案》，全港股民即刻進入作戰狀態，準備今朝大殺四方，而成件事最開心嘅人應該係梁振英喇，阿爺揀正佢農曆生日（七月十四日）送呢份大禮，仲唔係順便幫佢賀壽！
原以為大時大節通車
2014年滬港通開通，係李克強喺當年4月嘅博鰲論壇上宣佈，然後兩地籌備6、7個月，於年底通車，所以，之後每逢大時大節，好似七一慶回歸、十一國慶、今年5月全國人大常委會委員長張德江訪港，市場都會憧憬阿爺會順便宣佈落實深港通，點知次次都落空。
估唔到阿爺係等到農曆七月十四「鬼節」先至宣佈，嗱，除非阿爺唔為意CY喺鬼節生日，純粹咁啱呢日召開國務院常務會議，又咁啱各方面傾掂數，否則市場口痕友實將成件事，解讀為阿爺為CY送上生日禮物喇，再講遠啲，CY直情係得到阿爺嘅祝福，連任特首都冇難度㖭喇，除非唔係。
不過話分兩頭，港股近月炒起，唔多唔少係炒深港通概念，家陣落實開通，暫時嚟講，可以話市場最後一個美麗憧憬都實現埋，市場向來都係buy on rumor,sell on fact，即係炒憧憬嘅故事，𠵱家冇晒憧憬，炒乜好呢？