【《蘋果》記者徐嘉華里約直擊】
【本報訊】今屆里奧未開賽，香港「美人魚」歐鎧淳（Stephanie）已大出風頭，她在本月5日的開幕禮擔任港隊持旗手後，即變網絡大紅人，獲「東方維納斯」、「最美持旗手」等美譽，風頭可比「火雞姐」傅園慧。長髮披肩，鳳眼配可愛笑面，加上均勻身形，歐鎧淳的倩影透過直播鏡頭傳至世界每個角落；隨即被披露她與男友的花邊，她首次開腔說：「成件事都幾無奈。」還感謝男友事事力撐，包括支持她收回退役決定。
游完歷史性的女子4x100米四式接力賽後一天，暖和陽光下的里奧選手村內，Stephanie與小記聊聊今屆里奧、亦是她口中常說的最後一屆奧運會。Stephanie在開幕典禮上，身穿港隊裙裝制服，全程笑容滿面；談到外界給予她「東方維納斯」及「最美持旗手」的外號，Stephanie說得最多兩個字是「無奈」，「其實我冇諗過有咁大反應，我都係喺facebook睇到先知，我只可以話香港傳媒太錫我，煲得我太勁。我嘅感覺係好無奈，成件事好被動，我只係喺開幕禮行咗一圈，就俾人咁寫」。
不想被人肉搜查
儘管無奈，但讓她再選一次，Stephanie說還是會接受持旗手這光榮任務。其實在里奧前，小記也問過她是否想像退役師姐陳宇寧在北京奧運被攝入大螢幕後被瘋傳為「女神」，Stephanie即時反應說：「唔想做女神，更唔想俾其他人人肉搜查自己。」她說：「我想大家從游泳呢個角度認識我，我求嘅唔係一夜爆紅，而係慢慢了解我呢個運動員。」
可惜人肉搜尋還是出現了，有傳媒將她跟退役水球手男友Jonathan的戀情公諸於世，在這方面一向低調的她也說：「其實係整件事嘅概念問題，我放得上網嘅，佢哋就會摷到，我只可以講『食得鹹魚抵得渴』。」她慶幸男友事事都站在自己那邊，看事物亦比自己透徹；在擔任持旗手後爆紅這事上，男友反過來安慰她。「佢好支持我，每當唔開心時，佢都有方法令我釋懷，可能佢都做過運動員，用運動員感受去同我分析，永遠企喺我呢邊」。
「美人魚」坦言初到里約後水土不服，而那些與游泳無關的花邊更令她感不舒服，幸好她今屆只參加接力賽，而開幕禮與接力賽的賽期相距甚遠，才沒影響發揮。她說：「我應該好似何詩蓓一樣，喺比賽期間唔好上網，以前喺美國讀書都做到，但一返到香港，手機不離手嘅習慣又出現，我係從互聯網中得知自己喺開幕禮發生嘅事。我估，奧運完咗後，呢啲些新聞會消失。」
改口風放棄退役
Stephanie覺得以前運動員形象太古板，但運動員都是人，都有生活化的一面，「（傳媒）要將我生活化嘅一面寫出嚟冇問題，但要平衡，始終我係游泳代表，希望可以提多啲游泳嘅消息」。
那天接力賽後，在13歲就決定要走游泳這條路的Stephanie曾說過，若這樣退役也無悔，但沉澱過後，她想改一改口風：「比賽完嗰晚返選手村，同房施幸余（接力隊負責蝶泳）問我，真係退役？捨得嗎？我其實講退役係太高興兼冇諗清楚情況下講出嚟。的確，今屆奧運後退役我都無悔，接力賽已經係歷史，香港冇人出席過奧運接力賽，我哋最後攞到第14名，真係好開心。返港後先休息一陣，自己會再諗未來方向，可以肯定嘅係，以後游水唔會放喺第一位，要搵游水以外更合適自己嘅事做。」這真是淳粉絲的佳音！其實她才24歲，又畢業於美國著名大學柏克萊，前途實在不用擔心。
歐鎧淳小檔案
年齡：1992年5月30日（24歲）
身高：1米71
體重：60公斤
主項：背泳
學歷：美國柏克萊大學學士（主修環境經濟學）
長池個人港紀錄：50米及100米背泳、400米及800米自由泳
威水史：
2016里奧接力賽第14名
2015光州世大運銀牌（50米背）
2014仁川亞運接力賽3銅
2013天津東亞運1銀3銅
2010廣州亞運接力賽1銅
2009香港東亞運2銀2銅
榮譽：
2016行政長官社區服務獎狀
2009香港傑出學生獎
2008香港傑出少年獎
2007及2008香港傑運「傑出青少年運動員」
資料來源：《蘋果》資料室