吳若希自從同澳門闊少男友Alex公開戀情，愛得高調，之前蜜遊泰國、峇里，最近仲去咗台灣，其實台灣確係港人旅遊勝地，有唔少圈中愛侶都鍾意去台灣尋開心。
胡杏兒 李乘德
杏兒喺上年1月同剛拍拖冇耐嘅李乘德去台北出席友人婚宴，李乘德仲攬住杏兒，二人更於街頭喪啜，杏兒上年出嫁，成為李太。
熊黛林 郭可頌
熊黛林(Lynn)自2013年4月宣佈同天王郭富城分手後，翌年同郭可盈胞弟郭可頌撻著，前年12月蜜遊台灣四日三夜，出外十指緊扣，更貼面自拍，仲一齊浸情侶溫泉，早前男友求婚成功，有傳二人豪擲2千萬買豪宅築愛巢。
楊怡 羅仲謙
羅仲謙去年10月喺台灣拍電影《泡沫之夏》，女友楊怡人肉速遞飛去當地探班，被影到拍拖行饒河夜市，羅仲謙同楊怡今年3月秘密赴英國搞婚禮。
文詠珊 吳啟楠
有讀者爆料指JM去年6月與富二代吳啟楠蜜遊台灣著名景點十分，二人感情穩定。