選舉期間周街都係候選人嘅宣傳橫額，創造唔少就業機會，因為除咗製作橫額，仲有「𠝹爛」橫額嘅工種。公民黨九東參選人譚文豪特別拍片，向大家介紹番呢種「街頭藝術」！
喺新蒲崗一條滿佈橫額嘅街，譚文豪先介紹「快刀手」將橫額一劏為二「分離」作品，睇得出好乾脆利落。繼而就有一塊公民黨橫額「伏屍」地上，刀手明顯覺得譚文豪同傑哥好有藝術可塑性，專登喺傑哥嘅面上劏開（圖），估唔到譚文豪咁識國情，佢話：「相信呢位藝術家係嚟自北京，因為佢使出一招：刀削面。」
而同一條街，只有民建聯柯創盛同西環契仔謝偉俊嘅橫額冇被「加工」或「P圖」，都算另類奇觀，難怪譚文豪喺facebook上載短片介紹呢個九東新景點。該區其他參選名單，請參閱本報立會選戰網站 http://hk.apple.nextmedia.com/legco2016/region 。