一次棍與棍嘅相撞，兩種由外到內嘅悲痛，日本撐桿跳選手荻田大樹雖然連決賽都入唔到，做唔成今屆「鳥人」，不過佢就憑「大鳥」一躍而紅，成為「大鳥人」。
玩撐桿跳受「大鳥」所累
上周六嘅男子撐桿跳初賽，荻田大樹喺試跳5.3米時，發生意外一幕。佢挺胸收腹，蹬直對腳，大髀已經掂到橫桿，但支桿仍穩如泰山。佢眼見就嚟跳過，點知下體突然失控凸出，隔住條褲，一嘢撞落橫桿。大樹上嘅「大鳥」威力驚人，橫桿不行了，應聲倒下。忍受住男人最痛，睇住橫桿一齊跌落去，奧運獎牌希望落空，大樹由外到內感受到人生嘅無奈同悲痛。
噚日睇到單新聞，話有位身材豐滿嘅台灣女網民搭𨋢嗰陣被𨋢門夾親胸部，其實有時得天獨厚、天賦異稟都會帶嚟煩惱。喺初賽出局，大樹賽後都難掩失望，佢喺社交網站話呢次成績達唔到期望，多謝大家嘅鼓勵，但佢都好開心可以第一次參與奧運。睇番啲紀錄，原來28歲嘅大樹喺2009年嚟過香港參加東亞運，仲拎咗金牌。
達施華奪巴西第二金
噚日起，大樹被「大鳥」累到跌桿嘅慢鏡畫面喺網上流傳，各國傳媒都有轉載，就連美國《紐約時報》亦有報道，佢突然成為網絡紅人，風頭拍得住冠軍嘅巴西選手達施華。達施華喺初賽輕鬆晉級，到星期一嘅決賽，22歲嘅達施華試跳6.03米，雖然第一次衰咗，但第二次跳到，贏得巴西喺今屆奧運嘅第二金兼田徑第一金。至於上屆冠軍、法國嘅拿維蘭尼輸比賽之餘仲輸品，喺全場噓聲之下，試跳6.03米。喺第一次試跳失敗後，拿維蘭尼挑釁觀眾，向看台做出反豎拇指嘅dislike動作，觀眾噓得仲勁，而佢第二次試跳都衰埋，結果衞冕失敗得銀牌，觀眾即刻歡呼。
14歲開始練撐桿跳嘅達施華賽後都唔太相信自己嘅成績：「金牌？實在太不可思議嘞！呢次係我第一次跳得高過六米。」今次達施華嘅成績比個人最佳成績仲要高10厘米；當佢睇番慢鏡之後，感嘆：「感謝神呀，實在跳得太靚！」達施華亦係自1984年後首位贏得奧運田徑金牌嘅巴西男運動員。