上季贏得西甲同西盃嘅巴塞隆拿，喺周日嘅西超盃首回合，作客以2:0擊敗西維爾，先拔頭籌。雖然踢緊奧運嘅尼馬未歸隊，但頂上前同美斯、蘇亞雷斯踢三叉戟嘅阿達杜倫都唔錯，喺54分鐘交出助攻，阿蘇先開紀錄。其後杜倫被換出，青訓出身嘅蒙尼亞艾哈達迪喺77分鐘入替，踢咗四分鐘就入波，幫巴塞今場鎖定贏2:0，次回合喺禮拜三舉行，將會喺巴塞主場魯營踢。
安歷基話唔使買人
賽後巴塞主帥安歷基被問到使唔使買個前鋒返嚟做「MSN」嘅後備時，佢話見到蒙尼亞同杜倫踢得咁好，就算簽唔到人都冇所謂。不過，呢場巴塞傷咗兩個球員，左閘馬菲奧拉傷大腿要唞三周，而恩尼斯達就撞傷膝頭，就要缺陣兩星期。