【本報訊】創業之路無可能一帆風順，尤其是賣情趣用品這類冷門貨品。Sally CoCo一開始做網上生意，要處理的問題相對簡單，負責人朱凱頌（Picco）負責寫網頁，妻子呂穎恆（Vera）就負責設計，各施各法。開店時要面對的問題就複雜得多了，店內裝潢及傢俬是他們周圍尋寶以及一手一腳砌出來，但其他外在因素就要花時間去周旋。
第一個困難，就是遇上令人「好激氣」的物流公司。Picco指，「申請物流公司戶口申請唔到！有一次，有件貨品要運送去澳門，物流公司派人上門收貨，都唔係咩玩具，只是個陰道健身球，佢入到嚟店舖（見到賣情趣用品），講咗好耐，嗌大交咁滯，強調係色情、猥褻嘅，唔可以送去澳門」。
速遞員不肯送貨之餘，最搞笑的是，轉個頭竟然問：「有冇咩可以介紹吓，有個朋友就嚟生日」，激到Vera紮紮跳，「呢啲嘢係色情，唔啱你！」
第二個困難，則是開分店時曾遇上固執業主，以為他們搞黃色場所。Picco表示，「試過喺中環睇中個舖位，經紀好坦白咁講畀業主聽，係賣情趣用品，業主覺得係黃色事業，死都唔肯租畀我哋」。
不少上了年紀的業主都覺得，賣情趣用品同「邪骨」一樣不正經，會影響店舖價值，會有好多不良人等聚集，令大廈人流複雜，所以一聽到是賣情趣用品，就不聽解釋、不肯租。
除此之外，請人很難也是困難之一。現時Sally CoCo已經有三間分店，但當初招聘員工時亦遇到不少問題。「有試過喺JobsDB請人，但係唔太啱囉！可能我哋要求高」。Vera表示，店員不是一個純粹收錢的角色，亦不是計較員工的學歷，但要對性教育有熱誠，願意與人溝通。
現時他們用自己方式請人，例如在facebook登廣告，或者在一些性教育相關的活動上找人選。不過，當中仍有不少人帶獵奇心態求職，Picco表示，收過求職信上寫着，「我有興趣了解吓呢個行業，因為對我藝術工作可能有幫助」。現時店內員工全部都周身刀，對於性、內衣、甚至女性文化等知識，隨時比他們夫婦二人更在行。