今日係農曆七月十四，相信呢排都聽聽埋埋唔少本土鬼古。八方就問過香港民俗掌故研究者周樹佳，原來呢啲本土鬼古主要有三大來源。
佳哥話，大部份鬼古都嚟自日治時期，因為日軍喺香港殺人無數，加埋盟軍成日空襲，夾埋死咗好多人，唔少鬼古由嗰時流傳到𠵱家，一啲前軍營好似鯉魚門渡假村不時都會聽聞有鬼魂操兵。
有死人自然要地方去安葬，但佳哥指香港土地少，好多本來係墳場、亂葬崗等嘅地方都用嚟起樓，偏偏當時無做足工夫，超渡亡魂，好似何文田、灣仔日月星街、華富邨等，成人都有人話撞鬼。
嚴重血案亦會令冤魂留低，佳哥特別舉荔景邨樂景樓做例子，1984年有退役警員因求愛不遂，於低層單位殺死一對姐妹花，從此就成為凶宅，新租戶全部畀怪事嚇到搬走，終令房署決定將整個單位完全封死，但隔籬鄰舍仲話不時聽到傳出電視聲同水聲。