咪以為紅底就一定識得晒中南海嘅老細，選舉有阿爺撐就好巴閉，睇睇喺港島區參選嘅工聯會郭偉強，一條政治問題就露晒底，竟然唔認得李克強係邊位。相反同區對手民主思路黃梓謙卻認得晒7位政治局常委。嗱嗱嗱，愛國陣營要硬撐郭偉強，會唔會覺得好唔抵？
司馬文都認得
4位港島區候選人近日接受有線電視測試，睇吓可否睇樣認出7位中共政治局常委？7人分別係習近平、李克強、張德江、王岐山、劉雲山、俞正聲同張高麗。
由勞工界功能組別轉戰港島直選嘅工聯會郭偉強理應係大熱，話晒都係紅底陣營，點會冇相關認知？點知結果出乎意料，佢只能認出國家主席習近平同全國人大委員長張德江，連國務院總理李克強都認唔到，一度指住李嘅相話：「我哋嘅李克……強，唔係，李克強唔係呢個，我哋要搞清楚先。」之後耍冧仲搞錯埋政治局個名，話「唔好意思，我都唔能夠認識晒7位『政治委員會』嘅領導人」。
王維基、司馬文同黃梓謙亦接受挑戰，王維基認得李克強、習近平、張德江同王歧山；司馬文至少喺習近平外認得李克強。首戰直選嘅黃梓謙一枝獨秀，答中晒7常委嘅名，佢主修外交學，可能因此對政治議題有獨到觸覺。
對於郭偉強成為唯一一個認唔出李克強嘅候選人，網民議論紛紛，有人笑佢「連老細都認唔出」、「唔想撈定喇」；有人質疑「阿爺白養」、「咁都叫愛國？」唔知郭偉強使唔使面壁思過？該區其他參選名單，請參閱本報立會選戰網站 http://hk.apple.nextmedia.com/legco2016/region 。
李八方
mailto:[email protected]