雖然中國跳水隊嘅何姿喺周日里奧女子三米板決賽輸咗畀隊友施廷懋，但喺賽後就收到一份比金牌更好嘅禮物，就係老公！佢男友秦凱喺頒獎禮後突然求婚，令呢位25歲夢之隊靚女喺全場觀眾同對手嘅祝福下，變成準秦太！
夢之隊喺女子三米板決賽包辦金、銀牌，施廷懋以總分406.05分贏得冠軍，幫中國喺呢個項目實現八連冠，而何姿就以387.90分屈居亞軍，連續兩屆奧運都同金牌擦身而過。
不過，何姿都應該冇乜時間唔開心㗎喇，因為同佢拍咗接近六年拖嘅男友秦凱突然現身，當住全場觀眾面前單膝跪地，仲拎埋一早準備好嘅鑽戒求婚！
倫奧揭戀情 里奧成美眷
現場所有人見到呢個場面，梗係忍唔住起哄啦，秦凱同何姿講咗啲乜就真係冇人知，因為兩個人當時都冇帶咪喺身，不過何姿就話自己都太緊張，唔記得男友講咗啲乜：「其實都係大家都諗到嘅行貨對白啦，保證會對我好咁。我最感動嘅係佢應承會畀我恰足一世。」
不過，何姿又邊會捨得對秦凱唔好吖，30歲嘅秦凱喺四年前倫奧男子三米板爆冷只得亞軍嗰陣，何姿第一時間衝去佢身邊安慰佢，令呢段戀情曝光。秦凱喺奧運贏過兩金一銀一銅，而何姿就有一金二銀嘅佳績，奧運除咗係佢哋職業生涯嘅一張成績表之外，都見證住兩人嘅戀情開花結果。何姿仲講：「我哋都係靠對方嘅支持同鼓勵，先可以堅持到𠵱家。」
喺成個求婚過程，何姿要過咗兩三分鐘先一邊喊一邊點頭答應，佢事後就話其實冇猶豫過，只係唔好意思喺咁多人面前應承秦凱：「我真係完全估唔到佢會咁做！我啱啱比完賽，又咁多人望住，我有啲怕醜。」佢仲大爆自己事前完全唔知男友會求婚：「我哋喺比賽前有見過，佢當時好似喺度自言自語咁，但佢就呃我話佢唱緊歌囉！」
施廷懋食花生好過封后
贏得冠軍嘅施廷懋同季軍嘅意大利選手卡洛度，見到何姿應承秦凱嘅求婚之後，都勁興奮咁振臂歡呼，似乎「食花生」仲開心過當事人。其他選手事後都走上前向何姿送上祝福，最好笑嘅係加拿大選手艾貝兒見到何姿嘅鑽戒嗰陣，忍唔到捉住佢隻手望咗幾眼㖭，睇嚟都好恨嫁喎。