利福系老闆劉鑾鴻（細劉）今年2月安排大女劉今蟾與細仔劉今晨，分別加入利福國際（1212）同利福地產（2183）做執行董事，兩位富二代噚日首度主持利福業績會。兩姐弟好似同爸爸夾埋咁，三位一齊着黑色西裝同套裝，但其實今蟾、今晨都係未夠30歲，下次可以着得後生啲，家陣唔興咁老成㗎喇。
劉今蟾首度主持業績會，雖然多數由細劉發言，但佢都好留心，睇實文件，冇雲遊太虛，佢亦有答問題，介紹下崇光裝修後嘅生意表現。
細劉計劃要喺香港搞第三間崇光，投資仲可能過百億元，華華問佢係咪交晒畀劉今蟾負責，細劉冇正面回答，只係話每個項目都唔係由任何一個人決定，「冇話邊個操刀，係公司全體嘅成果」。都幾行貨喎。