德甲前哨戰德超盃周日舉行，由上季德甲同德盃冠軍拜仁慕尼黑，作客上季雙料亞軍多蒙特，唔好以為拜仁呢幾年都雄霸德甲，但其實已經連續三年喺德超盃失手，今季教練換咗安察洛堤就精神好多，下半場58分鐘，拜仁中場維達爾勁射，多蒙門將路文貝基擋出不遠，呢位智利國腳補射得手，拜仁先開紀錄，加上湯馬士梅拿79分鐘奠勝，以2:0擊敗多蒙特，肥安拎到上任後首個冠軍。
曉姆斯倒戈好感慨
呢場波除咗係肥安首盃外，另一個焦點就係兩位倒戈兵，中堅曉姆斯今夏就由多蒙特轉投拜仁，今仗擔正仲幫球隊保清白身，佢賽後就話重返西格納伊度納公園，真係感觸良多，亦都得到主隊球迷掌聲。而經過拜仁三年冷板之旅後，馬里奧葛斯今夏就愛回家返多蒙特，不過今仗就只列後備冇份落場，但都有好多「蜜蜂」球迷高舉橫額歡迎佢。