英超新一季焦點，普遍都係齊齊換帥嘅曼市雙雄曼聯同曼城，今周開鑼兩隊都齊齊贏波，不過大事擴軍嘅利物浦首戰亦都好勁；紅軍周日英超夜場作客阿仙奴，落後一球之下最遠反超前4:1，最終以4:3贏波，新兵以沙迪奧文尼最搶鏡，領隊高路普就繼續緊張大師本色，亦令呢場入球騷比賽更精采。
紅軍新兵文尼搶鏡
利物浦喺季前嘅國冠盃，曾經喺倫敦大炒地上最強巴塞隆拿4:0，今次再到倫敦鬥阿仙奴又點會驚；「讓球」盤臨場瘋狂落飛，利物浦原本受讓平/半，到開賽前已經轉平手，仲要低水㖭。陷中堅荒嘅阿仙奴，要由哥林張伯斯同洛賀丁一對「95後」合作扼守中路，當然唔穩陣。不過兵工廠都有好開始，禾確特30分鐘主射12碼宴客，好彩佢一分鐘後將功補過，右路勁射幫阿仙奴先開紀錄。
紅軍呢場以菲臘比古天奴、羅拔圖法明奴同文尼三個快馬打三箭頭，攻到阿仙奴左路甩晒轆，古天奴上半場補時妙射罰球，幫紅軍追成1:1平手，換邊後頭18分鐘更加係紅軍天下，拉爾拉拿、古天奴同文尼各建一功，拋離到4:1，文尼63分鐘右路個人突破，連過蒙利爾同張伯斯兩關射入，紅軍用3,400萬鎊買佢，抵啦。
高路普一向係緊張大師，呢場慶祝入球時，更加興奮過度兩次飛甩眼鏡，夠晒搞笑。雖然及後阿仙奴由阿歷士張伯倫同張伯斯各建一功，幫槍手追成3:4，但改變唔到輸波命運，紅軍以4:3險勝，新一季就開門紅。幫紅軍射入反超前入球嘅拉爾拉拿，賽後就話半場休息嗰陣，高路普對佢哋訓話，所以球隊先有明顯改善。
兵工廠近四季英超揭幕戰輸足三場，賽後引發唔少陰謀論，話領隊雲格有心咁做，令球會放水買人，特別係中堅位置，梅迪薩卡同基比爾包列斯達長唞，更加要擴軍。
施治賽後炒車黑仔
據英國《天空體育》報道，華倫西亞中堅梅斯達菲料即將加盟，轉會費就係1,700萬鎊；不過雲格賽後就話球會其實大把錢，不過仲未有心儀球員咁話，真係唔知雲格幾時先出手。其實紅軍呢場防線都麻麻，特別係左路，左閘艾拔圖摩蘭奴又被炮轟，紅軍亦傳出想買人補充，要買德國國腳祖拿斯赫達就有啲難度，馬高斯阿朗素同辛迪亞高加西亞就算係平靚正選擇。
首戰失四球，阿仙奴門將施治亦都患得患失，賽後揸車離開阿聯酋球場嗰陣，竟然喺停車場撞車，好在只係輕微碰撞，施治人冇事，不過架名車奧迪就有少少傷。
