正義聯盟李偲嫣去到邊都成為焦點，估唔到就連真人不露相嘅地方，都好鬼受注目，仲惹嚟唔少投訴，嫌佢阻碇。
話說有讀者向本報投訴，話已經參選咗立法會新界東選舉嘅李偲嫣，將大批選舉宣傳單張存放喺沙田火炭豐盛工業中心7樓貨𨋢升降機大堂（圖）；由於「體積」好龐大，根本係嚴重阻塞通道，所以已經向管理處以及消防處投訴，有人則喺大堆有待分發嘅宣傳單張上，貼出鐵定8月16日星期二早上10時正全部搬走嘅字條。
八方同事噚日中午登門了解，真係見到一大堆李偲嫣嘅宣傳單張幾乎塞爆成個大堂，同真人一樣好有份量。有工人則將部份單張推入A14號室，入面確實存放咗李偲嫣嘅宣傳品；單位內一男一女就同八方同事話李偲嫣唔喺度，隨即關門。該區其他參選名單，請參閱本報立會選戰網站 http://hk.apple.nextmedia.com/legco2016/region 。