中環在線：
Hooters開張　侍應熱情 - 李華華

唔使等到佛誕！「波霸餐廳」Hooters噚日終於開張，華華當然第一時間去到中環老蘭望望喇。Hooters原定3點開門，但華華去到都要等半粒鐘先入到去，唔係因為排長龍，而係一班性感女侍應要做最後準備啫。
可能時間尚早，開門後，唔見太多人幫襯，只係得幾枱客仔，門口周不時有男男女女停低望入去影相，侍應亦會熱情say hi。人少都有好處嘅，就係每枱都有一個侍應專門招呼。侍應嗰頭送出雞翼，轉頭又要跳舞表演，認真要多才多藝。
講到食物質素與價錢，138蚊10件雞翼，178蚊4個小burger，可以接受，冇得飲啤酒就令人有啲失望。公關話，餐廳仍未有酒牌，所以只可以提供果汁、汽水，晚上11點閂門。唔夜蒲唔緊要，中環人可以lunch time落去食個晏。