民主黨「黨花」、貌似韓國藝人李英愛嘅沙田區議員曾素麗（Yen）原來係家中幼女，有3個阿哥，兒時嘅阿Yen相當活躍，最愛同哥哥去公園捉迷藏同打鞦韆。雖然好動，但佢話從未同人打過交，全因有私人「保鑣」，「有3個阿哥幫我出頭」。
自細鍾情跑步
28歲嘅阿Yen鍾情跑步。佢喺沙田仁濟醫院董之英紀念中學讀書時玩過校內比賽，跑個人100米同4乘100米接力，雖然唔算跑得快，「但都有返咁上下耐力」。舊年當選區議員後冇放棄跑步，會喺馬鞍山海旁跑，街坊跑跑吓隨時捕獲到佢㗎！
雖然阿Yen當選前試過因為文宣寫錯字，主動罰抄100次而網上「成名」，但原來阿Yen文筆唔差，小學曾以《十年後的我》為題寫文獲獎。講返呢段小學回憶，佢忍唔住狂笑，皆因佢當年寫自己10年後會奪奧斯卡金像獎！但更難忘係當年獲獎後，佢被老師要求喺全班同學面前朗讀文章，「真係幾尷尬㗎！」中七時亦試過因為一篇議論文，獲校內中文作文考試第一名。佢喺樹仁讀大學時因為實習計劃做過議員助理，繼而入民主黨並參選區議員，原來佢中學時期試過同同學喺維園擺年宵，旁邊就係支聯會，最記得係華叔寫揮春十分了得。
