體操「情侶」喺周日一齊拎牌！今屆巴西里奧體操隊入面有位混血小鮮肉叫諾利，靚仔指數拍得住阮馬素，唔少女粉絲都流晒口水。正所謂近水樓台，美國體操天后比妮絲就快人一步，喺奧運一開始已經喺社交網站上載兩人擁抱嘅合照，仲笑話諾利係佢嘅巴西男友，好似宣示主權咁喎！雖然比妮絲之後話佢哋只係朋友，喺體操比賽有共同目標，但佢兩個啲合照就真係好鬼曖昧囉。好似喺周日咁，諾利贏咗男子自由體操銅牌（上圖），而比妮絲同日就贏咗女子跳馬冠軍，佢兩個賽後好似孖公仔，搭晒膊頭又頭貼頭咁影張咀獎牌相（下圖），比妮絲仲喺張相同留言度加晒心心，同個錫錫嘅表情符號。睇番佢兩個喺社交網站啲紀錄，諾利喺大半年前就已經將佢錫比妮絲塊臉嘅相放咗上網㗎喇，同埋佢哋會用Babe互稱對方，究竟佢哋係咩關係呢？