一場立法會選舉，可以見盡人生百態；好多突如其來嘅舉動，更會睇到大家目瞪口呆。好似平時霸氣盡現嘅上水鄉事委員會主席侯志強，參選新界東後變溫柔？佢近日喺facebook上載片段，話喺後巷發現兩隻被遺棄嘅小狗，呼籲好心市民收養，又話區內棄養狗隻情況常見，直斥：「唔想養就唔好生，小動物都係生命」，其後仲拉住小狗雙手同佢合照㖭。
不過片中見到侯志強抱狗手勢好生疏吓喎，有網民話呀：「咁樣抱狗真係第一次見，你當你捉蟹咩？」唔少網民留言揶揄佢連抱狗都唔識，小狗似乎只係選舉宣傳工具，估唔到侯志強會回覆網民留言，唇槍舌劍掀罵戰，例如有網民諷刺佢只講不做：「你大把錢養，你做乜唔養？」，侯反問：「李嘉誠大把錢，佢唔養埋你？」該區其他參選名單，請參閱本報立會選戰網站 http://hk.apple.nextmedia.com/legco2016/region 。
識睇睇留言
Reo Law：轉頭今晚加餸
Redia Lau：唔忍心浪費食物？
KH Wong：真係好有愛心……選舉前～
Kei Wong：對阿婆又唔見咁善心，仲倒泥頭落人哋塊田
資料來源：《蘋果》網頁及facebook