繼葛珮帆被指係「野雞大學博士」之後，再有民建聯成員嘅學歷備受質疑。
話係碩士遙距課程
民建聯九龍東候選人柯創盛（圖）喺官方網站上自稱碩士，但就冇寫邊間大學；至於facebook專頁同宣傳片上，佢只係話自己中學畢業，又話「小時候成績不差，但因為家裏太窮，所以出來工作」。有讀者就同八方爆料，話柯創盛嘅碩士學位有問題。
八方噚日喺民建聯立法會選舉造勢大會上問柯創盛，佢就話佢讀嘅係工商管理碩士，係透過遙距課程讀嘅，柯創盛仲強調自己係讀咗3年㗎。
不過八方多次問佢喺邊間大學讀，佢就點都噏唔出，係咁話「遲啲補充畀你」，連邊個國家嘅大學遙距課程都講唔出，好難唔令人懷疑喎，唔知佢幾時會補充番啲資料畀八方，以釋公眾疑慮呢？
該區其他參選名單，請參閱本報立會選戰網站 http://hk.apple.nextmedia.com/legco2016/region 。