尼馬終於識入波，巴西似乎開始上力喎！上周六奧運男足八強，東道主巴西靠隊長尼馬喺12分鐘開紀錄，加埋盧恩古靴美埋齋，以2:0擊敗哥倫比亞，禮拜三就會同洪都拉斯爭入決賽，洪軍喺八強就以1:0淘汰南韓。另一場四強就會由德國對尼日利亞，德國喺八強贏得有霸氣，以4:0大破葡萄牙；至於政府唔夠錢畀機票，又畀唔起酒店錢嘅尼日利亞，得到陣中車路士中場約翰米基爾接濟後越踢越爭氣，喺八強贏丹麥2:0。根據足智彩嘅冠軍賠率，復勇嘅巴西當然係大熱，熱到得1.53倍，次熱嘅德國有3.35倍，尼日利亞就有六倍，洪都拉斯大冷有30倍。