隔牆有耳：
着36年前吊帶裙　卿姐拉票兼找數 - 李八方

民主黨主席劉慧卿今屆拍住林卓廷選新東，噚日佢就到大圍拉票時順道「找數」。找乜數？話說卿姐28歲喺大台做緊記者時，曾經着過吊帶裙出鏡成為一時佳話，佢之前應承過一眾記者，卸任立法會議員前再次以呢件珍藏30幾年嘅吊帶裙亮相。

事前唔使節食

據聞卿姐考慮到喺立法會唔適合着吊帶裙，惟有拉票時先找數；佢笑言唔係專登留住條裙，而係每次搬屋都執埋，對上一次着係有個朋友百歲生日，佢以經典造型到賀；而上屆立法會選舉，佢都有着過呢條吊帶裙去西貢拉票。
64歲嘅卿姐着吊帶裙前，有無節食keep吓fit？卿姐即刻話：「黐線，節咩食？我好肥咩？我使節食？」仲自認環保大使，同時向市民下戰書，問有無人搵到件買咗36年嘅衫出來着？真係自信爆棚喎！
卿姐着吊帶裙出巡到沙田期間，仲撞到自由黨田北俊團隊拉票。最近港大滾動民調顯示田少團隊會出局，難怪黨高層如周梁淑怡等都出動箍票。該區其他參選名單，請參閱本報立會選戰網站 http://hk.apple.nextmedia.com/legco2016/region 。