英格蘭名宿連尼加舊年12月下巴輕輕，話如果李斯特城贏到英超冠軍，佢就淨係着條底褲主持MOTD（Match of the Day）。新一季英超上周六開鑼，佢亦有找數，但就有少少出蠱惑，因為佢着嘅嗰條褲，似短褲多過似底褲囉。
着波褲當找數
李斯特城贏咗上季英超，拋離亞軍嘅阿仙奴10分，而講過如果「狐狸」贏聯賽就着底褲講波嘅連尼加，亦喺上周六嘅英超開鑼日找數。上身冇着衫、下身淨係得條白色底橫嘅連尼加，好正經咁做節目，但坐喺佢身後嘅舒利亞同伊恩胡禮就喺度奸笑，後者更表現出幸災樂禍嘅樣。佢哋之後齊齊分析點解李城會輸畀侯城1:2嘅時候，連尼加都淨係着條底褲，直到個節目講曼城主場對新特蘭場波，佢先着番恤衫同埋西褲。連尼加同觀眾講：「胡鬧完畢，我要着番啲衫褲。」
雖則連尼加有找數，不過就有少少出蠱惑。佢係就係半裸做節目，但佢身上印有李城隊徽嘅白色褲，點睇都唔似底褲囉，根本同球員踢波嗰條短褲冇分別。前英格蘭國家板球隊隊長禾漢就話：「我睇完之後有啲失望囉。」BBC體育主播丹獲丹亦抽水：「說好的底褲呢？」但都有人欣賞佢，叫barryj嘅網民就話：「短褲同底褲係有分別，雖然連尼加有啲出蠱惑，但至少兌現承諾。」叫wkk嘅網民仲讚佢身材好：「連尼加嘅身形好過朗尼好多。」效力史篤城嘅前英格蘭國腳前鋒高治亦話：「連尼加冇着衫褲做節目都可以表現得咁專業，真係好嘢。」連尼加找完數之後，睇怕佢以後都唔敢再睇小啲黑馬囉。