電視台每日發表滾動民調，每個選區領先人物大同小異，尾隨其後嘅就好似日日不同。睇咗一個星期，左丁山只有一個初步印象，就係民主黨行錯棋，人地講換血，民主黨啲老人家又話退居二線，讓新人上台；以現在嘅滾動民調睇，民主黨嘅新人（排名單頭位）知名度甚低，無號召力，民調大落後，似跑馬出閘大脫腳，要在直路追上嚟，都唔知要花幾大氣力先至掂。反之，建制派有三四隊以「中駟對下駟」方法，憑資格老，知名度高，在芸芸候選人之中，淨係憑住「有人識」呢樣，已經遙遙領先，分分鐘可以拖埋排名單第二嘅大後備入埋立法會，令民主黨候選人「死亡慘重」。
到咗九月四日情況有無一如民調預測，好難講，因為還有近乎30%選民未有決定，呢啲游離票會成為決定性因素。飲茶時，一位商界老友G講：「我有兩票，功能組別選舉我梗係支持尋求連任嗰位啦，但偶然收到民意調查電話，我一定話支持同中聯辦有聯繫嘅候選人，我個仔有一次聽到我講電話，事後大表不滿，話我係頑固藍絲帶。」咁咪兩仔爺鬧晒交，令媽咪難做？商界G話：「細佬哥唔識世界，不知道實則虛之，虛則實之嘅道理。人地配票配到神乎其技，咪俾啲挑戰佢地囉。」
諗咗五秒，先知佢實際上講乜，不過呢招人人會用，你估保皇黨真係好蠢咩，如此一來，滾動民調是否能夠真正反映真正民意？木宰羊。大概統計學上嘅「大數法則」會將呢類因素調整校正（even out），最後結果不致受到大影響。
直至目前為止，九月立法會選舉仲未引起選民大興趣，只有建制愛國報紙每日以巨大篇幅報導，內容集中宣傳根正苗紅建制派，攻擊黃絲帶政治團體，當然一啲都唔會講求公平公正。其他報紙就知道選舉新聞係票房毒藥，報導篇幅比較少，也有電台辦選舉論壇，內容悶到抽筋，有幾多選民會收聽呀？電台討論節目都少講啦，每講及一個候選人，就要花近兩分鐘講埋其他可能係第一次見到嘅名字，真係咪攪嘞！
今年立法會選舉之直選參選人，不少以年資為準則，老一輩紛紛退下，例如新界東一位票后明明做得好好，偏要退休。日前見到幾位屋邨阿婆阿嬸，佢地話：「唔見票后就無所適從，其他人一係唔識，一係唔鍾意，都唔知投俾邊個好，九月四號慳番啖氣好過。」