美國「水神」費斯喺上周六里約奧運游泳項目最後一日賽事，同班隊友喺男子4x100米四式接力強勢奪冠，以第23面奧運金牌為職業生涯畫上完美句號。費斯喺泳壇嘅地位，大概同「籃球之神」米高佐敦（MJ）喺籃壇一樣，冇人可以取代！
上周六男子4x100米四式接力，除咗係里奧游泳項目最後一戰，亦係費斯嘅告別戰。美國男子接力隊亦冇令粉絲失望，打頭陣嘅賴恩梅菲喺頭100米背泳游出破世界紀錄嘅51秒85，雖然第二棒蛙泳嘅高迪米拿俾英國超前，不過負責蝶泳嘅費斯即刻搶番優勢，混血飛魚艾安恩喺最後一棒自由泳亦不負眾望，以3分27秒95首名觸池奪金。
難忍淚水展人生新章
費斯喺艾安恩觸池後已經難忍淚水，而觀眾席上嘅妮歌見到未婚夫再贏一金後都喊到收唔到聲。費斯一早話里奧係職業生涯終極一戰，難怪賽後好激動咁話：「其實我今（噚）日一落車行去比賽場館時，已經忍唔住好想喊。今次係我最後一次着起美國隊戰衣，最後一次喺咁多人面前為國家而戰，感覺真係好瘋狂。」不過，費斯就話自己為職業生涯畫上句號，亦代表人生新章嘅開始，期待有多啲時間陪屋企人。
費斯從2000年初次喺奧運亮相，到2016年里奧總共以23面金牌向粉絲告別，呢位31歲泳手可以話係奧運史上最出色嘅運動員之一，甚至有網民將佢同另一位「神」──MJ相提並論，因為兩人個名都係米高，職業生涯又同「23」呢個數字有關，仲喺奧運大放異彩，就連費斯都承認MJ對自己嘅影響好大：「MJ喺籃球場嘅成就令我深受啟發，我想喺泳壇交出同樣成績。23係一個特別嘅號碼，𠵱家對我嚟講亦變得更特別。」
接力女隊成美國「千金」
同日美國隊憑住碧加、莉莉京治、禾瑪同文妮奧喺女子4x100米四式接力以3分53秒13稱后，贏得美國喺奧運史上嘅第1,000面金牌。
