股評人界又有是非！事緣2014年由股佬變身芬佬嘅吳家順，喺fb控訴同事「郭嘉耀」，相信係指股評人郭家耀（Matthew）搞小動作，影響佢基金運作，件事被遺漏嘅一個花生位，係另一芬佬黃國英（Alex）躺着也中槍，被點名係Matthew講是非嘅對象，無啦啦捲入是非。
根據吳家順所講，Matthew不停喺股評人界話佢「好煩」，仲主動同Alex講佢基金輸咗乜嘢。Alex噚日承認，Matthew曾經搵過佢查詢風險管理系統嘅問題，而講完正經嘢，佢口痕問咗句「做乜輸咁多？」，結果就捲入呢件事，佢強調，只係同Matthew傾過一次咁大把，而且大家只係交流，無意講是非。
Alex話，呢件事最無奈係，令人覺得佢八卦，而事實佢唔係，不過「唔緊要喇，都冇乜所謂，同埋我哋呢行講多都無謂喇，講到尾，咪又係睇回報，最緊要對得啲客住」。一貫Alex作風，睇得開。