新民黨主席葉劉淑儀缺席喺前日早上錄影、夜晚播出嘅港台港島區選舉論壇，惹嚟唔少爭議，不單因為代佢上陣嘅團隊女將陳家珮同王政芝都係大肚婆，令同區女參選人公民黨陳淑莊Tanya同工黨何秀蘭都鬧葉劉搵大肚婆做擋箭牌。咁都不特止，後來自稱有病嘅葉劉，更被人發現佢同日下午去咗石澳食厚多士兼收禮，乜病咗都咁好胃口？結果同區對手王維基噚日拉票巧遇葉劉，上前質問佢係咪講大話，未到投票已經火花四濺！
陳家珮前日喺論壇講過葉劉點解唔出席，陳話佢哋係團隊、有分工，但Tanya睇唔過眼，噚日再喺facebook開葉劉拖，指錄影長達4個半鐘，逾半時間要企，工作人員休息時間雖然有搬凳畀準媽媽，「我係佢（葉劉），就會親自應付論壇，咁刺激嘅工作唔會推畀該兩位女士」，又反問「點分工呀？佢哋選立法會，葉劉去選特首？」
葉劉於是喺fb解畫，自稱上周三開始肌肉痛兼發燒，原來係感冒。雖然食咗抗生素，但咳嗽依然好嚴重，專科醫生日前開咗5日含類固醇嘅藥，仲未好返先至派人替補，指兩人腹大便便，但表現好好。
話故意畀年輕人歷練
睇到呢度，係咪擔心葉劉病倒了陰功豬？但有網民心水好清，質疑陳家珮點解論壇上又冇提嘅？最搞笑係病到咁嚴重，葉劉仲可以入石澳拉票？因為佢fb上載同日喺石澳食厚多士同收梅菜做禮物嘅相，搞到排喺Tanya條隊第二嘅鄭達鴻喺fb揶揄，「厚多士，梅菜王可以醫感冒？醫學嘅嘢，市民真係識條鐵咩？」
而參選港島嘅王維基噚日下午就喺fb自爆「巧遇『病咗嘅』葉太」，繼而上載質問葉劉係咪講大話嘅短片。葉劉片中強調冇詐病，食緊藥，唔信叫對方去養和問下；面對魔童不斷進擊，葉劉越講越激動，話「論壇我係故意畀年輕人去歷練吓，得唔得呢？」最後嬲嬲豬鬧對方「你含血噴人呀！」病咗仲咁好中氣，應該冇乜事嘅，大家可以放心喇！該區其他參選名單，請參閱本報立會選戰網站 http://hk.apple.nextmedia.com/legco2016/region 。
李八方
mailto:[email protected]