上周五上演里奧女足八強戰，美國女足踢足120分鐘都贏唔到瑞典女足，1:1逼和對手，喺互射12碼仲輸3:4，四連霸美夢幻滅之餘，亦係首次入唔到奧運女足決賽。之前衰口臭而搞到俾巴西球迷狂寸嘅美國龍門蘇露又四圍辣火頭，大鬧瑞典球員係「懦婦」，睇嚟佢唔知咩叫奧運精神。
自1996年亞特蘭大奧運增設女足之後，美國屆屆都入決賽，仲贏過四面金牌，只係喺2000年悉尼奧運輸畀挪威而得銀牌。美國今屆里奧力爭四連霸，喺上周五同瑞典爭入四強，但對住擺明守到完場博射12碼嘅瑞典，佢哋冇晒辦法，仲喺61分鐘俾布歷絲甸奧絲攻入而落後。不過，雅歷絲摩根喺77分鐘幫美國追成1:1。加時之後都係踢成1:1，要互射12碼分勝負，但美國有摩根喺第一輪射失，由功臣變罪人，到第五輪再有比絲宴客，而瑞典由達姬慧射入贏4:3，四強將會對同樣靠12碼晉級嘅巴西。
國民鬧爆：冇體育精神
之前寸巴西有寨卡而搞到俾巴西球迷狂噓嘅美國龍門蘇露，賽後鬧爆瑞典。35歲嘅蘇露話：「叻啲嗰隊今日贏唔到，我認為我哋同懦婦踢緊波囉。瑞典成場波又唔攻又唔交波，根本唔係踢波囉。」之前教過美國嘅瑞典教練桑夏治神回：「我哋去里約熱內盧，佢哋就返屋企。」
但係美國傳媒同網民都唔撐佢，批評佢輸唔起同冇體育精神，甚至認為佢唔應該再代表美國參加奧運。講真，美國前主帥桑夏治領軍嘅瑞典踢出賽前部署，美國贏唔到應該怪自己無能，而唔係怪人踢防守足球。咁都未算，蘇露喺第五輪12碼時疑似擾敵，無嗱嗱話要換手套，達姬慧等咗幾分鐘先射得，但奸有奸輸，達姬慧照幫瑞典入致勝12碼。
中國射失12碼八強止步
另外，中國喺另一場八強輸畀德國0:1，有後備王珊珊未踢夠一分鐘就被罰黃牌，57分鐘仲要兩黃一紅被逐，結果喺76分鐘失守。完場前本來有扳平機會，可惜王霜主射12碼中柱唔入。賽後靚女龍門趙麗娜唔學似蘇露咁輸波呱呱嘈，願意接受失敗，佢喺微博話：「我哋冇留低遺憾，四年後再見。」