上周五舉行嘅女團爭先賽，宮金杰同鍾天使兩位中國車手真係一出場就搶盡風頭，因為佢哋兩個嘅頭盔竟然畫咗啲京劇臉譜喺上面，仲幫中國贏到金牌。
平時班選手嘅頭盔多數只會印國旗表明身份，不過中國單車隊嘅宮金杰同鍾天使嘅頭盔上，分別畫咗花木蘭同穆桂英嘅京劇臉譜，寓意中國單車隊可以喺里奧戰無不勝喎；而男單車手徐超個頭盔就畫咗張飛嘅臉譜，唔知劉備同關羽又幾時會出場？
望住兩個好似紙紮公仔咁嘅樣衝向自己都咪話唔驚，唔知其他選手係咪俾呢款頭盔嚇窒咗，中國車隊喺女團爭先賽一路過關斬將，喺四強仲以31秒928打破世績！而宮金杰同鍾天使喺決賽亦都未受考驗，以32秒107力壓俄羅斯贏得冠軍，仲為中國單車隊贏得史上首面奧運金牌！
另外，英國車隊喺同日舉行嘅男團追逐賽決賽以3分50秒265打破世績，擊敗澳洲贏得冠軍。主將韋堅斯亦都喺五屆奧運累積贏八面獎牌，當中包括五金一銀兩銅，成為英國史上贏得最多奧運獎牌嘅單車手！佢賽後話：「我呢16年嚟都係奧運冠軍，呢個感覺真係好正！」