小海龜俾人遺棄喺垃圾站，好彩遇到好心人，終於同其他海龜一齊重返大海。呢個唔係《海底奇兵3》劇情，係香港發生嘅「真龜真事」。
漁署東南水域放生
漁護署噚日公佈，過去3年，有市民分別喺西貢白腊沙灘、銀線灣泳灘同埋北角天后廟道一個垃圾收集站，發現3隻瀕危的幼年綠海龜。
獲救嘅小海龜被送去海洋公園暫住同護理。到現在3隻龜已經有8.6公斤至34.5公斤重，健康良好，適宜重返大海生活，所以噚日喺香港東南面嘅水域，將3隻海龜放番入大海。
漁護署仲幫3隻海龜植入晶片，又喺背甲上裝咗衞星追蹤儀，追蹤佢哋動向同埋覓食位置，幫助當局制訂存護海龜措施。