大日子呀！噚日係香港特區市委書記梁振英62歲壽辰，大家有冇慶祝先？唔使喇，梁特自己慶祝咗。噚日佢正日生日，佢喺臉書po張生日蛋糕相，但張相真係得個生日蛋糕，冇見同佢慶祝嘅人，連禮物都冇份。好在八方搵咗兩位即將卸任嘅議員同梁特首賀壽，仲問問想送乜禮物畀佢，點知一個話送背囊畀佢，另一個仲話送白果㖭呀！
大家都話，生日即係父母嘅受難節，而鬼節出世嘅梁特噚日喺臉書嘅留言盡現孝心，佢話「生日........是想念父母的日子」，標準省略號有6個點，梁特用夠8個，夠孝心喇啩！跟住佢感謝同事們嘅蛋糕、感謝市民拍兼喺網上傳嘅短片，仲要感謝「大家」嘅電郵同短訊。
蛋糕就見喇，上面用英文寫住「生日快樂，特首」。梁特果然係梁特，連蛋糕都淨係用英文特首縮寫「CE」，梁特話有片、電郵、同短訊賀佢，八方見唔到，只見有幾個賀佢留言，不過嬲嬲就有超過8,000個！
嫻姐想送白果做賀禮
至於齊昕亦有喺fb貼出向父親送上生日蛋糕嘅相賀壽，不過呢個蛋糕同CY貼嘅嗰個唔同，牌仔冇寫到CE兩字；但佢又向同樣係1954年8月12日出生嘅法國總統奧朗德道賀，形容奧朗德係「his brother from another mother（另一母親生嘅兄弟）」。由於齊昕fb畀網民公開留言，未不少網民即留言嘲諷梁特，有人提議齊昕「畀封利是佢，101蚊」，亦有人祝「6特首」早點退休，「錫多d（啲）chai yan，做個好老竇」。
八方搵咗工黨張國柱同工聯會陳婉嫻向梁特道賀。張國柱祝梁特「退休快樂」，事關人總有退休嘅一日，仲希望梁特「好似我咁早啲退休」，同埋可以的話送個背囊畀佢，等佢執好啲嘢，退休後行吓山、去吓旅行。
至於嫻姐就嚴肅好多，佢話希望梁特反思、檢討，撫心自問呢幾年嚟為打工仔做過啲乜。至於送禮，嫻姐禮尚往來，話梁特呢幾年請打工仔食咗唔少白果，所以就送番白果一粒畀梁特。八方問過特首辦，梁特點樣慶祝，不過就冇回音。
李八方
mailto:[email protected]