猶記得喺四年前倫敦奧運，英國單車小情侶積遜堅尼同卓爾睇緊沙灘排球嗰陣，情不自禁喺碧咸背後「打茄輪」，即時上咗英國小報頭條。事隔四年，佢哋訂咗婚仲係咁恩愛，前日亦成為里約奧運嘅新聞人物，但就唔關親熱事，而係單車場上齊齊交出好成績。
積遜堅尼追六金傳奇
里奧場地單車賽周四開波，由卓爾、雅治波特、芭嘉同露素辛特組成嘅英國女子隊，喺女子團體追逐賽預賽，就以4分13秒260打破由澳洲保持嘅4分13秒683舊世界紀錄。有睇倫奧嘅朋友，都知道現年24歲嘅卓爾好有實力，上屆就擸咗女子全能金牌，仲幫英國贏咗女子團體追逐賽，今夏好有機會喺里奧冧莊。佢話：「每次我同隊友落場比賽都係想贏，以金牌為目標，但就冇諗過破世界紀錄囉。」至於積遜堅尼亦戰力十足，仲喺周四男子團體爭先賽決賽幫英國踩出42秒440嘅奧運紀錄，以0.102秒之差擊敗新西蘭奪金，三連霸之餘兼攞到個人第四面奧運金牌。
卓爾恨做「爵士夫人」
睇見未婚夫咁勁，卓爾都認為佢有力打破英國單車名宿賀爾嘅奧運六金紀錄：「佢好明顯有進步，表現仲好過四年前，真係有機會平紀錄。我都好想佢封爵，咁我就可以做『爵士夫人』，咁就正嘞。」積遜堅尼就話：「新西蘭真係好快，仲喺準決賽破咗我哋嘅奧運紀錄。我哋唔係奪金大熱，不過鬥心好強，卒之贏咗佢哋，真係好開心。」佢之後仲會出戰男子個人爭先賽同凱林賽，力爭成為里奧三金王。賀爾亦睇好積遜堅尼可以平紀錄：「我覺得佢應該可以衞冕個人爭先賽。凱林賽唔易應付，可能要講啲彩數，但我都睇好佢。」若然積遜堅尼真係平紀錄，睇怕打茄輪場面又會重現囉。
