已報名參選新西、出咗名注重環保的朱凱廸，最近喺網上發起回收橫額行動後，最近又有新搞作，就係由義工幫手畫橫額，表達朱凱廸參選政綱以外認同的訴求。
話說近日元朗安興街公園附近，出現咗一幅有兩個黑色巨型手掌印的橫額（圖），旁邊仲有個大大個朱凱廸嘜頭。八方打聽之下，知道呢幅橫額出自朱凱廸一位朋友之手，細看之下，兩個手掌印中，分別印上咗一隻貓仔同狗仔掌印，主要係想表達「不棄養，不買賣」、保護動物的訴求；而用上兩隻黑色手掌，係因為朱凱廸皮膚好黑。呢位朱凱廸朋友話，朱凱廸今次選舉真係做到「由下而上」體現民主，話相信呢幅係香港少數以保護動物為單一主題橫額，可能係香港開埠以來首次喎。該區其他參選名單，請參閱本報立會選戰網站 http://hk.apple.nextmedia.com/legco2016/region 。